Bazuar në përkthimin e Prof. Abduletah Abu Gudde
Botues: AIITC
Viti: 2012
ISBN: 99943-703-8-3
Kurani është një Libër që në kontaktin e parë ngatërron, çorienton. Asgjë si ai nuk të jep përshtypjen e së Absolutes. Nuk ka një hyrje të njohur, të menjëhershme dhe të lidhur me ndonjë të dhënë konkrete: historinë e një populli, si Testamenti i Vjetër, apo historinë e një njeriu, si Ungjilli në lidhje me Krishtin. Kushdo që është mësuar me logjikën euklidiane, që e njeh vijën e drejtë si vijën më të shkurtër (dhe të arsyeshme) mes dy pikave, do të mahnitet nga lëvizja spirale e mendimit kuranor, gjithnjë duke synuar monoteizmin absolut.
Kurani është një libër hyjnor, dhe shpirti fluturon nga vullneti i tij brenda hapësirës së tij: nga mistika te ligji, nga normat fetare te ato civile, nga rregullat e jetës së përditshme te kronikat historike të njerëzimit.
Ndryshe nga në Biblën Hebraike, Kurani nuk kufizohet te një popull i caktuar, por i drejtohet të gjithë njerëzimit. Por ka një lidhje të drejtpërdrejtë dhe të pandashme me gjuhën arabe, të cilën Zoti zgjodhi për t’i komunikuar njerëzimit të Tij Mesazhin e Fundit. Pas zbritjes së Shpalljes Hyjnore në formën e një gjuhe të saktë, përkatësisht arabishtes klasike, përkthimi i saj në një gjuhë tjetër bëhet i vështirë. Prandaj është më mirë të flitet për një përkthim interpretues të tij.
Meqë Kurani është një tekst i shenjtë, është e vështirë të mendohet se një gjuhë tjetër përveç origjinalit mund të përcjellë në mënyrë të përsosur kuptimet dhe implikimet e tekstit, pa lënë asnjë dyshim, kufizim apo keqkuptim që mund të cenojë një kuptim të thellë dhe një praktikë fetare të nivelit të lartë. Ky pohim është në përputhje me qëndrimin e përgjithshëm të fesë islame mbi mundësinë e përkthimit të Kuranit.
Megjithatë, duhet thënë se një përkthim kompetent, me qëllim të mirë dhe autoritativ i një përkthimi është një instrument i domosdoshëm për fitimin e njohurive të përgjithshme të Librit, qoftë nga ana e një lexuesi që niset nga një interes i caktuar, në mënyrë të paanshme, qoftë nga ana e një besimtari që nuk ka mjetet për të bërë një lexim plotësisht të vetëdijshëm të origjinalit, edhe pse e përdor atë në lutjet e tij të përditshme.
Është pikërisht ky qëllimi i ribotimit të përkthimit të Kuranit nga Instituti Shqiptar i Mendimit dhe Qytetërimit Islam. Kujdesi për t’iu përmbajtur fjalë për fjalë tekstit origjinal është në harmoni me përpjekjen për të shprehur kuptimin e tij në një shqipe të qartë dhe të saktë. Kjo është një premisë e dobishme dhe një garanci e fortë për ta marrë mesazhin dhe për ta futur atë saktë në mendjen e lexuesit të zakonshëm shqipfolës.
Prandaj, ftojmë të gjithë lexuesit e faqes sonë, që nuk janë në gjendje ta shkarkojnë drejtpërdrejt versionin e ri të përkthimit të Kuranit në shqip, ta shkarkojnë në formën elektronike të ofruar në këtë faqe.